Prof. dr hab. Miloš Řezník (ùr. 1970 w Rychnovie nad Kněžnou, Czeskô) òd 2014 rokù je direktorã Niemiecczégò Historicznégò Institutu we Warszawie, a równoczasno òd 2009 r. profesorã eùropejsczi regionalny historie na Ùniwersytece w Chemnitz (Saksoniô, Niemcë).
Sztudérowôł historiã na Ùniwersytece Karola w Pradze, dze w 1999 r. òbronił téż doktorsczi dokôz na témã regionalnégò i lokalnégò patriotizmù w Królewsczich Prësach w XVIII wiekù. Habilitowôł sã w 2007 r. na Ùniwersytece Pałacczégò w Òłomùńcu, zajimającë sã pòzmianama elitów i zbiérnyma juwernotama w nawléczenim do pòlsczich pòwstaniów w latach 1794–1864. Robił w Minysterstwie Bùtnowëch Sprôw Czesczi Repùbliczi (1995–1996) jakno rôdca ds. Pòlsczi i pòlskò-czesczich òdnieseniów. Pòtemù robił w Seminarium Pòwszechny i Przërównywny Historie Ùniwersytetu Karola w Pradze (1998–2001), Zakładze Historie Ùniwersytetu w Libercu (1999-2001), w Centrum Historie i Kùlturë Westrzédno-Wschòdny Eùropë (GWZO) w Lipskù (2001-2002) a téż w latach 2002-2009 jakno „Juniorprofessor” na Ùniwersytece w Chemnitz.
Òd 2007 r. je nôleżnikã, a òd 2009 r. przédnikã czesczégò partu Czeskò-Niemiecczi Kòmisje Historików, òd 2016 r. nôleżnikã Niemieckò-Ùkrajińsczi Kòmisje Historików. Òd 2017 rokù je téż przédnikã Nôùkòwégò Towarzëstwa m. Jabłonowsczich (Societas Jablonoviana) w Lipskù.
Jakno historik zajimô sã historią Westrzédno-Wschòdny Eùropë (òsoblëwie historią Pòlsczi, Czesczi, Litwë, Aùstriacczi i Saksonie) òd nowòżëtnëch czasów do terôczasnotë. Przédné òbrëmia badérowaniów: nôrodné rësznotë, regionalizm, pòzmianë elitów, kùltura i fùnkcjonalnota historie, zbiérné juwernotë, romantizm. Jegò przédné dokazë (òkróm wspòmnióny doktorsczi prôcë i habilitacje) namienioné są historie Galicje, habsbùrsczi mònarchie i przërównywny regionalny historie. Kaszëbską témizną zajimô sã òd 90. lat. Òd 2007 rokù je nôleżnikã Kaszëbsczégò Institutu we Gduńskù, a òd 2015 rokù Kaszëbsczi Kòmisje Gduńsczi Stacje PAÙ.
Trzimô spòlëznowé fùnkcje jakno nôleżnik nôùkòwëch abò dozérnëch radzëznów rozmajitëch institucjów (Akademiô Nôùków Czesczi Repùbliczi w Pradze, Collegium Bohemicum Ùscé nad Łabą, Institut Saksońsczi Historie i Etnologie Drezno, Fùndacjô Lessera Jena…) i cządników (m.jin. „Acta Cassubiana”, „Rocznik Gdański”, „Studia Wilanowskie”, „Archeion”, „Slovanský přehled”, „Journal of Modern European History”) a téż jakno nôleżnik nôùkòwëch towarzëstwów (Nôùkòwô Radzëzna m. Herdera w Marbùrgù, Prëskô Historicznô Kòmisjô, Pòlskò-Czesczé Nôùkòwé Towarzëstwò).
Białka Lenka Řezníková – historik, lëteraturoznajôrz i klasyczny filolog, robi w Instituce Filozofie Akademie Nôùków Czesczi Repùbliczi w Pradze.
