Justina Pòmierskô – adiunkt w Zakładze Stosowóny Pòlonisticzi Gduńsczégò Ùniwersytetu, òd 2015 je nôleżniczką Zarządu Kaszëbsczégò Institutu (òd 2021 r. trzimô fùnkcjã sekretérë) i Kaszëbsczi Kòmisje kòl Nôùkòwi Stacje PAÙ we Gduńskù. Słëchô do Towarzëstwa Lubòtników Pòlsczégò Jãzëka. Nôleżniczka redakcje nôùkòwëch cządników „Acta Cassubiana” i „Język – szkoła – religia”. Òstała pòwòłónô do Radzëznë Mùzeùm Kaszëbskò-Pòmòrsczi Pismieniznë i Mùzyczi we Wejrowie (2020-2024).
Z ùlubieniô ùczi jak ùczëc (sã); czedës szkólnô pòlsczégò jãzëka we wejrowsczi szkòle, dzysô didaktik pòlsczégò i kaszëbsczégò jãzëka. Widzącë, że sprawa naùczaniô kaszëbsczégò jãzëka je in statu nascendi, jak i lëterackô kaszëbizna, w tim òbrëmim dzejô i pùblikùje; òd 2011 r. czerowniczka pòdiplomòwëch sztudiów Naùczanié kaszëbsczégò jãzëka, wespółùtwórczka czerënkù kaszëbskô etnofilologiô (sztudia I st. na Filologòwim Wëdzélu GÙ), dzysdnia przédniczka Programòwi radzëznë tegò czerënkù. Òd dekadë rëchtëje tekstë na Kaszëbsczé diktando, òd 2015 r. je wespółòrganizatorką nôùkòwò-didakticznëch kònferencjów na GÙ, òd 2016 r. kòòrdinëje interdiscyplinarny kaszëbòlogiczny wëkłôd na Filologòwim Wëdzélu GÙ, wespółrobi z Centralną Egzaminacjową Kòmisją w zespòle jãzëkòwëch mniészëznów.
Prowadzëła nôùkòwé badérowania zrzeszoné z kaszëbską i zôpadnosłowiańską paremiologią. Na spòdlim doktorsczi disertacje napisóny pòd czer. Jerzégò Sampa pòwstała ksążka Przysłowia kaszubskie. Studium z paremiografii i paremiologii (Kaszëbsczi Institut 2013), w jaczi je sztudium ò dzejach kaszëbsczi rzeczónczi òd pòł. XIX w. do pòłowë XX w. i Księga przysłów kaszubskich, tj. słowôrz kòl 12 tës. rzeczónków. Je wespółaùtorką przërównywnëch słowarzów (paremiograficznégò i frazeòlogòwégò) w szesc jãzëkach: czesczim, słowacczim, pòlsczim, kaszëbsczim, dólno- i górnołużicczim wëdónëch w Òstrawie (2010, 2016) i kaszëbskò-pòlsczégò zbioru Przësłowie samò sã rodzy w głowie. Kaszubskie przysłowia z polskimi odpowiednikami (Òficyna Czec 2002, 2010).
We wespółaùtorstwie wëdała dwie mònografie w dwajãzëkòwi wëdôwny serie Kaszëbsczégò Institutu i Kaszëbskò-Pòmòrsczégò Zrzeszeniô Vademecum: Język kaszubski/ Jãzëk kaszëbsczi (z J. Trédrã i D. Pażdżersczim, 2015) i Kaszubi w III RP/ Kaszëbi w III RP (z Ł. Grzãdzëcczim i C. Òbracht-Prondzyńsczim, 2019). Bëła nôleżniczką interdiscyplinarnégò badérnégò karna Kaszëbsczégò Institutu, jaczi przërëchtowôł i wëdôł encyklopediã wiédzë ò Kaszëbach pt. Gniazdo gryfa. Słownik kaszubskich symboli, pamięci i tradycji kultury (2020, grant Nôrodnégò Programù Rozwiju Hùmanisticzi, czerownik projektu: prof. dr hab. Cezari Òbracht-Prondzyńsczi) – tu òbrobiła trzë duce zéwiszczów tikającëch sã kaszëbsczégò jãzëka i edukacje.
Wejrowianka, żeniałô, matka trójczi dzecy.
