Dr Katarzëna Kùlikòwskô, etnolog, socjolog. Òd 2015 r. direktór Mùzeùm – Kaszëbsczégò Etnograficznégò Parkù m. T. i J. Gùlgòwsczich we Wdzydzach. W 2014 r. ùdostała stãpień doktora w òbrëmim etnologie i kùlturowi antropòlogie na spòdlim doktorsczégò dokazu Etnografia muzeum etnograficznego. Przypadek muzeów pomorskich. W latach 2004–2014 robiła w Òddzélu Etnografie Nôrodnégò Mùzeùm we Gduńskù, òd 2012 r. na stanowiszczu kùstosza. Nôleżniczka Kaszëbsczégò Institutu i Pòlsczégò Lëdoznajôrsczégò Towarzëstwa. W latach 2012–2016 bëła wiceprzédniczką Òddzélu PTL we Gduńskù, w latach 2015–2018 skarbnikã KI. Je nôleżniczką Mùzeòlogiczny Sekcje PTL.
Òprôcowała albùm Wdzydzanie (MKEP, 2017), jaczi òstôł achtniony przez kapitułã Pòmòrsczi Artisticzny Nôdgrodë i dôł ji nominacjã w kategórie Artisticznô kreacjô a téż dostôł wëprzédnienié w Kònkùrsu wëdôwiznów kaszëbsczi lëteraturë. Wespół z P. Zatoniã przëszëkòwała albùmë: Znaki tożsamości. Wzór haftu kaszubskiego w przestrzeni publicznej (2017), jaczi ùdostôł II môl w kategórie edicjô kaszëbsczi ksążczi, Boże Narodzenie w przestrzeni publicznej Kaszub (2018), Gryf w przestrzeni publicznej Kaszub (2019) i Barwy kaszubskie w przestrzeni publicznej (2019). Wespółredagòwała z prof. dr. hab. C. Òbracht-Prondzyńsczim ksążczi: Kulturowe analizy patriotyzmu (2016), Śmieć w kulturze (2015), Pomorska debata o kulturze. Kultura na pograniczu – pogranicza kultury. Edycja II (2015), Pomorska debata o kulturze. Kultura na pograniczu – pogranicza kultury (2014), Etnoinspiracje. Inspiracje kulturą ludową we współczesnym polskim wzornictwie, modzie, architekturze, reklamie… (2013) a téż Kaszubi a Gdańsk. Kaszubi w Gdańsku (òbr. wespół z prof. J. Borzëszkòwsczim; 2009). Je aùtorką artiklów tikającëch sã etnologie i mùzeòwnictwa, wespółaùtorką prowadnika pò MKEP (2019).
Wëstôwczi na spòdlim ji scenarników dostałë: wëprzédnienié w kategórie Etnograficzné wëstôwczi w XXXVIII Kònkùrsu na Mùzeòwé Wëdarzenié Rokù „Sybilla 2017” (wëstôwk dlô dzecy Muzeum do zabawy?) a téż nominacjã w XXXII Kònkùrsu na Mùzeòwé Wëdarzenié Rokù „Sybilla 2011” (wëstôwk Etnoinspiracje). Ekspòzycje Zorze (2021) i Muzeum do zabawy? (2017) ùdostałë Nôdgrodë Marszôłka Pòmòrsczégò Wòjewództwa w kònkùrsu „Pòmòrskô Mùzeòwô Nôdgroda”. Prowadzoné przez Katarzënã Kùlikòwską mùzeùm za dzejania zrzeszoné z òtmikanim institucji na pòtrzébnotë pùbliczi i wëdôwné dzejania dostało nominacjã w plebiscyce „Pomorskie Sztormy” (2018), ùdostało II môl w Rankingù „Muzea przyjazne dzieciom” (2018) a jegò nowô wizualnô identifikacjô òstała wëprzédnionô òb czas III Przezérkù Widzewné Mùzeùm 2017. Katarzëna Kùlikòwskô zajimała sã téż projektowanim aranżacjôw mùzeòwëch ekspòzycjów. Brała ùdzél w rozmajitëch warkòwniach i mùzeòwëch kùrsach. Je téż psychòlogã zwierzãtów, a szpecjalizëje sã w psychòlogie kòniów.
