Prof. dr hab. Józef Bòrzëszkòwsczi (ùr. w 1946 r. w Kôrsënie) béł robòtnikã Gduńsczégò Ùniwersytetu (Institutu Historie) òd jegò pòwstaniô w 1970 r. do czasu przeńdzeniô na emeriturã w 2017 rokù. Titel profesora hùmanisticznëch nôùków dostôł w 1992 r.
Je historikã XIX i XX wiekù, szpecjalistą òd kaszëbsczich i pòmòrsczich témów na szeroczim kùlturowim, spòlëznowim, pòliticznym i gòspòdarczim spòdlim. Je aùtorã abò wespółaùtorã cziledzesąt ksążków i setków nôùkòwëch, pòpùlarizacjowëch artiklów, biograficznëch céchów, recenzjów etc. Je ùwôżónym editorã zdrzódłowëch i lëteracczich tekstów a téż wdôrnikòwëch dokùmentów. Do te je redaktorã dzesątków zbiérnëch dokazów, w tim czile mònografiów pòmòrsczich wsów i gardów. Stwòrził i redagùje seriã „Pro memoria”, w jaczi wëszło smarą wicy jak 20 tomów namienionëch lëdzóm kùlturë i nôùczi Kaszëb i Pòmòrzô. Béł téż òrganizatorã dzesątków nôùkòwëch kònferencjów i sympòzjów.
Òkróm nôùkòwi robòtë wôżné je jegò włącziwanié sã w pùbliczné sprawë. Prof. J. Bòrzëszkòwsczi w latach 1990-1996 béł gduńsczim wicewòjewòdą, a w latach 1991-1993 téż Senatorã RP, przedstôwcą Kaszëbskò-Pòmòrsczégò Zrzeszeniô, w jaczim òb dwie kadencje – w latach 1986-1992 – béł przédnikã Òglowégò Zarządu. Òd zôczątkù wej warkòwi karierë prof. J. Bòrzëszkòwsczi parłãcził nôùkòwą robòtã ze spòlëznowim dzejanim, òsoblëwie w kaszëbskò-pòmòrsczi rësznoce. Ju jakno sztudéra òstôł przédnikã Klubù Młodi Inteligencje „Pomorania”, dzejającym kòl Òglowégò Zarządu KPZ, a pózni téż przédnikã Gduńsczégò Partu i nôleżnikã Òglowégò Zarządu Zrzeszeniô – ti nôwikszi dzysô na Pòmòrzim bùtenrządowi òrganizacje. W 1996 rokù béł pòczãtnikã pòwstaniô Kaszëbsczégò Institutu – stowôrë lëdzy nôùczi, chtërny zajimają sã kaszëbskò-pòmòrską témizną. Trzimôł fùnkcjã przédnika Institutu do 2015 r., a pòtemù òstôł wëbróny Pòczestnym Przédnikã. Òd 1999 r. je nieprzeriwno przédnym redaktorã nôùkòwégò rocznika „Acta Cassubiana”.
Prof. J. Bòrzëszkòwsczi òd 2013 rokù je nôleżnikã-kòrespòndentã Pòlsczi Akademie Ùmiejãtnoscë, a do te nôleżnikã wielnëch nôùkòwëch towarzëstwów, m.jin. Pòlsczégò Historicznégò Towarzëstwa, Gduńsczégò Nôùkòwégò Towarzëstwa, Nôùkòwégò Towarzëstwa w Torniu, Nôùkòwégò Towarzëstwa m. Wòjcecha Kãtrzińsczégò w Òlsztinie. Òb wiele lat dzejôł w Nôùkòwi Radzëznie Gduńsczi Biblioteczi PAN.
W 2005 r. J. Bòrzëszkòwsczi dostôł Nôùkòwą Nôdgrodã Miasta Gduńska m. Jana Heweliusza za rok 2017 w òbrëmim hùmanisticznëch i spòlëznowëch nôùków, a w 2016 Nôdgrodã Prezydenta Miasta Gduńska w Òbrëmim Kùlturë. Òkòma te czile razy dostôł nôdgrodë Rektora GÙ i Minystra Nôrodny Edukacje. Wëprzédniony òstôł Nôdgrodą „Pòliticzi” (1986 r.), Medalã Stolema (1976), Kawalersczim Krziżã Òrderu Òdrodë Pòlsczi (1989), Nôdgrodą i Medalã m. Z. Glogera (2000), Medalã Pro Meritis przez Pòlskò-Skandinawsczi Institut w Kòpenhadze (2004), Medalã Ksãca Mscëwòja przez Radzëznã Miasta Gduńska i title pòczestnégò mieszkańca gminów Kôrsëno i Brusë w rodny Zôbòrsczi Zemi.
Òkróm tegò prof. J. Bòrzëszkòwsczi w latach 1992-1999 béł Przédnikã Wòjewódzczégò Zarządu OSP, nôprzód w gduńsczim wòjewództwie, a pózni w pòmòrsczim. Béł téż nôleżnikã-załóżcą gduńsczégò Klubù Katolëcczi Inteligencje i nôleżnikã Programòwi Radzëznë Wëdôwiznë Pelplińsczi Diecezje „Bernardinum”.
