Prof. dr hab. Cezari Òbracht-Prondzyńsczi (ùr. w 1966 r. w Bëtowie) robi w Instituce Socjologie Gduńsczégò Ùniwersytetu, dze je czerownikã Zakładu Spòlëznowi Antropòlogie, a w latach 2005-2012 béł direktorã tegò Institutu. Òd 2017 je téż czerownikã Pòmòrsczégò Centrum Badérowaniów nad Kùlturą GÙ. Titel profesora hùmanisticznëch nôùków dostôł w 2012 rokù.
Je historikã, socjologã i antropòlogã. Jegò badérné zaczekawienia tikają sã przédno problematiczi Kaszëb i Pòmòrzô, a do te ùdzélu w kùlturze, nôrodnëch i etnicznëch mniészëznów, kùlturowëch jiwrów dzysdniowòscë, regionalny pòliticzi, dzysdniowi pòlsczi spòlëznë. Je aùtorã abò wespółaùtorã wicy jak 30 ksążków, redaktorã abò wespółredaktorã wicy jak 20, aùtorã czileset nôùkòwëch, pòpùlarnonôùkòwëch, pùblicysticznëch artiklów.
Je nôleżnikã-kòrespòndentã Pòlsczi Akademie Ùmiejãtnosców, trzimô fùnkcjã czerownika Stacje PAÙ we Gduńskù i przédnika Kaszëbsczi Kòmisje dzejający kòl Stacje. Je przédnikã Kòmitetu Socjologie PAN (lata 2020-2023), a do te wespółzałóżcą i dzysdnia przédnikã Kaszëbsczégò Institutu. Je nôleżnikã Gduńsczégò Nôùkòwégò Towarzëstwa, Nôùkòwégò Towarzëstwa w Torniu i Pòlsczégò Socjologicznégò Towarzëstwa.
Je animatorã kùlturë, przédnikã Pòmòrsczi Radzëznë Kùlturë i nôleżnikã czile spòlëznowëch òrganizacjów, w tim przede wszëtczim Kaszëbskò-Pòmòrsczégò Zrzeszeniô. Trzimô spòlëznowò fùnkcje w mùzeòwëch radzëznach (Zôpadnokaszëbsczé Mùzeùm w Bëtowie, Mùzeùm Gduńska), w Programòwi Radzëznie Nadbôłtowégò Centrum Kùlturë we Gduńskù, Historiczno-Programòwim Kòlegium Eùropejsczégò Centrum Solidarnoscë we Gduńskù, Nôùkòwi Radzëznie Elbińsczi Biblioteczi, Radzëznie Fùndacji „Kaszubski Uniwersytet Ludowy”. Bierze ùdzél w robòtach Programòwi Radzëznë Fùndacje „Wspólnota Gdańska”, Nôùkòwi Radzëznë ds. regionalizmù kòl Krajowi Radzëznë Rësznotë Regionalnëch Stowôrów RP.
W latach 1995-2000 béł przédnym redaktorã miesãcznika „Pomerania”, a dzysdnia je nôleżnikã nôùkòwëch radzëznów czile cządników.
W 1995 dostôł nôdgrodã Fùndacje „POLCUL” za spòlëznową i kùlturową robòtã na Pòmòrzim, a w 2004 Nôdgrodã i Medal m. Zygmùnta Glogera. Je dobiwcą Nôùkòwi Nôdgrodë Miasta Gduńska m. Jana Heweliusza za 2017 rok w òbrëmim hùmanisticznëch i spòlëznowëch nôùków.
Białka Jolanta robi w Zespòle Ekònomiczno-Ùsłëżnotowëch Szkòłów w Bëtowie, a córka Hana je doktorã technicznëch nôùków w òbrëmim architekturë i ùrbanisticzi i robi na Gduńsczim Ùniwersytece.
