Dr Bògùsłôw Breza ùr. w 1962 r. w Kalëskach pòd Kòscérzną, absolwent historie (1986 r.) i prawa (1989 r.) Gduńsczégò Ùniwersytetu. W 1992 r. skùńcził sądową aplikacjã, zdôwającë sãdzowsczi egzamin. Warkòwą robòtã zaczął w 1986 r. w Mùzeùm Kaszëbskò-Pòmòrsczi Pismieniznë i Mùzyczi we Wejrowie. W ti institucje przeszedł wszëtczé rówiznë pòdwëżbë òd asystenta do kùstosza. Òd 1991 r. do 2007 r. béł ji direktorã. Miôł dozér nad cawnym remòntã i adaptacją ji prestiżowi sedzbë, tpzw. Pałacu Przebendowsczich we Wejrowie. Aùtór òglowi ùdbë ùpòrządkòwaniô ji zbiorów, wëdôwny, pòpùlarizatorsczi i edukacjowi pòliticzi. Wespółòrganizatór czilenôsce nôùkòwëch i pòpùlarno-nôùkòwëch kònferencjów. Wespółpòczãtnik i òrganizatór warającëch do dzysô cyklicznëch rozegracjów, jak kòncertë „Muzyka w Pałacu”, lëteracczégò kònkùrsu m. J. Drzéżdżona, wëdôwnégò cyklu „Biblioteka Kaszubska”. Òb czas robòtë we wejrowsczim Mùzeùm béł nôleżnikã nôùkòwëch i programòwëch radzëznów czile institucjów kùlturë, w tim Mùzeùm Kòcewsczi Zemi w Starogardze Gduńsczim i Wejrowsczégò Centrum Kùlturë. W 2013 r. òstôł prawnym rôdcą i wëkònywô nen wark w òbrëmim gwôsny Kancelarie w Rédze.
Je nôleżnikã Kaszëbsczégò Institutu i Kaszëbskò-Pòmòrsczégò Zrzeszeniô, w jaczim òd cziledzesąt lat wchôdô do przédnëch wëszëznów, a w latach 2011-2016 béł przédnikã partu w Rédze.
Jegò nôùkòwé i pòpùlarizatorsczé zaczekawienia są zebróné wkół szerok rozmióny historie a téż kùlturë Kaszëb i Pòmòrzô. Je aùtorã czileset artiklów na tã témã, biogramów bëlnëch pòstacjów tegò regionu, wespółaùtorã czilenôsce historicznëch mònografiów kaszëbsczich môlëznów, redaktorã „Dziejów gminy Wejherowo”, „Dziejów gminy Rzeczenica” i pòkònferencjowëch materiałów „Strajki szkolne na Kaszubach w l. 1906-1907”. Stójno wespółrobił z czile môlowima cządnikama, dzysdnia z „Pòmeranią”, na jaczi starnach są pùblikòwóné jegò òpisënczi ksążków z kaszëbskò-pòmòrską témizną. W 2016 r. ùdostôł titel doktora historie, broniącë dokazu „Historia Miasta i Gminy Wejherowo w okresie międzywojennym”.
Żeniałi z Renatą z d. Òżańską, doktorã stomatologã, z chtërną mô dwòje dozdrzeniałëch dzecy, Lészka (absolwent ekònomie GÙ) i Sławinã (absolwentkã anielsczi filologie i prawa na GÙ).
