Biuletin Radzëznë Kaszëbsczégò Jãzëka

Rocznik, jaczi dzejô kòl Radzëznë Kaszëbsczégò Jãzëka, to je dorôdczégò karna, co jistnieje òd 1996 r. przë Òglowim Zarządze Kaszëbskò-Pòmòrsczégò Zrzeszeniô. Pierszi numer „Biuletinu” wëszedł smarą w 1997 r. Przédnym redaktorã òstôł wnenczas É. Bréza i trzimôł tã fùnkcjã do 2017 r. Sekretérą redakcje bëła R. Wòsôk-Slëwa. Òd 2018 r. przédnym redaktorã je D. Kalinowsczi, temòwima redaktorama: M. Cëbùlsczi (jãzëkòznajôrstwò), A. Kùik-Kalinowskô (lëteratura), D. Pażdżersczi (slawistika), D. Stanulewicz-Skrzëpiec (edukacjô). Jãzëkòwim redaktorã je D. Pioch, sekretérą redakcje B. Ùgòwskô. W Nôùkòwi Radzëznie dzejają slawiscë z pòlsczich i zagrańcznëch akademicczich òstrzódków.

„Biuletin” wëchôdô w dwùch jãzëkòwëch wersjach – kaszëbsczi i pòlsczi. Przédnym zadanim pisma je pùblikacjô ùchwôlënków Radzëznë Kaszëbsczégò Jãzëka (np. ùgòdzenia tikającé prakticzi ùżiwaniô kaszëbiznë, bédënczi sparłãczoné ze standarizowanim jãzëka). Aùtorzë, chtërny pùblikùją w „Biuletinie”, òdnôszają sã do òbzérónëch jãzëkòwëch i spòlëznowò-kòmùnikacyjnëch pòzmianów, jedne taksëjącë pòzytiwno, a jinszé negatiwno, wërôbiającé swòjã nôdbã na spòdlim jãzëkòznajôrsczi wiédzë i didakticznégò doswiôdczeniô. Dzejanié na taczi ôrt je zgòdą z célama fùnksnérowaniô Radzëznë Kaszëbsczégò Jãzëka, chtërna trzimô doradzeniową, normalizacyjną i rozsądzeniową fùnkcjã. W cządnikù wëchòdzą smarą bédënczi czerowóné do szerok rozmiónégò òkrãżô brëkòwników kaszëbiznë, jaczé swiôdczą nié leno ò robòce wkół standarizowaniô kaszëbsczégò jãzëka, ale téż ò achtnienim kaszëbsczich gwarów i codniowi gôdczi. Bédowóné rozrzeszenia pòdskacywają szëk naùczaniô kaszëbsczégò jãzëka w szkòłach abò mają wpłiw na rozwiązania w òbjimie spòlëznowégò żëcô (np. zapisënk pòzwów môlëznów na drogòwëch tôflach abò òbrôbianié specjalisticzny słowiznë w òbrëmim prawnëch abò hùmanisticznëch nôùków).

W „Biuletinie Radzëznë Kaszëbsczégò Jãzëka” pòjôwiają sã téż nôùkòwé artikle sparłãczoné z kaszëbską temizną prezentowóną na rokrocznëch kònferencjach, jaczé mają kònkretné temë. Pisóné są òne przez ùczałëch akademicczégò òkrãżô, szkólnëch kaszëbsczégò jãzëka a téż regionalistów i animatorów, słëchającë discyplinie akademicczégò abò pòpùlarnonôùkòwégò diskùrsu. Westrzód donëchczasnëch prowadnëch temów kònferencjów Radzëznë Kaszëbsczégò Jãzëka pòjôwiałë sã zéwiszcza: słowizna snôżich kùńsztów, spôdkòwizna dzejaniów Jana Trepczika, rok 1920 w kùlturze Kaszëb abò kaszëbsczi séwôrze chrzescëjańsczégò Słowa. Brzadëje to tim, że w kòżdim numrze rocznika są zamkłé wëpòwiescë na jednã temã òpisywónô z rozmajitëch pòzdrzatków.

W „Biuletinie Radzëznë Kaszëbsczégò Jãzëka” pùblikòwóné są téż kaszëbsczé i pòlsczé tłómaczenia tekstów w cëzëch jãzëkach, co tikają temów standarizacje (np. D. Škiljan, V. Blažek). Pòchòdzą òne ze slawisticznégò rëmù badérowaniów i pòkazywają szlachòwné jãzëkòwé i spòlëznowò-kùlturowé pòzmianë w jinëch słowiańsczich tradicjach. Dôwô to mòżlëwòtã wezdrzeniô na standarizacjã kaszëbsczégò jãzëka z gwësny czasowi i teritorialny dalekòscë i wëzwëskaniô doswiôdczeniów ùdostónëch w jinëch jãzëkach w dzysdniowi robòcë w òbrëmim kaszëbsczich sprôw.

Daniél Kalinowsczi

Bibliografiô:

• Biuletin Radzëznë Kaszëbsczégò Jãzëka. Indeks zawiartoscë Biuletinów RJK, red. D.V. Paždjerski, Gduńsk 2013
• Paždjerski D.V., Porządek w normie. Problem normalizacji języka kaszubskiego w działalności Rady Języka Kaszubskiego (2007-2016), [w:] Porządek słów. Gramatyka, tekst, styl, dyskurs. Księga jubileuszowa dedykowana Profesor Zoi Nowożenowej z okazji 45-lecia pracy naukowej, Gduńsk 2019, s. 78-86

Netografiô:

Wszëtczé numrë „Biuletinu”: https://rjk.org.pl/biuletyny/

Ikònografiô:

1. Zdrzódło: Kaszëbsczi Institut